علاء عبدالمنعم يكتب: “البيزنس” الخفي وإتحادات الشاغلين الوهمية

يعني إيه اتحاد شاغلين؟!

ببساطة بعيدا عن الكلام “المجعلص”.. يعني أنا وأنت وسيادته بنكون اتحاد للشاغلين بنص القانون الملزم سواء كانت بناية واحدة أو عدد من البنايات ولايقل عدد شاغلي البناية عن خمسة، بالنسبة للمجاورات الكبيرة لازم بيبقي في صورة شركة لها وديعة في البنك للصرف علي الصيانة. عشان كده لما بتحجز شقة في كومبوند محترم لازم تدفع حاجة اسمها دفعة صيانة.

واذا فقد الاتحاد احد هذه الشروط او لم يوفق أوضاعه بعد صدور القانون الجديد في فترة زمنية قدرها ثلاثة أشهر يعتبر لاغي، ويتم انشاء اتحاد جديد، بإنتخابات رئيس وأمين صندوق.

– طيب ودور الاتحادات ايه ياعمنا؟!!!

دور الاتحادات صيانة الأجزاء المشتركة للمباني من الوديعة

– طيب الاتحادات لها دور تاني؟!!!

لاء طبعا، دوره هو الصيانة فقط، اما (…) يستخدموا اسم الاتحادات في اشياء اخري مستغلين جهل الناس بالقوانين ومعظمهم بلا هوية، عشان كده بتلاقي في الاتحادات دي مجموعة من الفشلة يمهرون صحفهم علي فيس بوك وغيره بأسم الاتحادات الوهمية بل راح بعضهم من المتخلفين عقليا يثبت انه رئيس كذا في الاتحاد كذا بالبطاقة الشخصية ليتخذ من العمل التطوعي مهنة له يتربح منها.
– طيب بالنسبة للاتحادات اللي خرجت بعد ٢٥ يناير؟!
معظمها اخد رقم تحت مسمي بضع بنايات من منطقة كذا.. بالمخالفة للقانون وبالمستندات يعني لو فرضنا قانونيتها فهي اتحادات جزئية لا تمثل سوي عدد البنايات التي صرح بها.
– طيب ما اجهزة المدن كانت بتتعامل معاهم؟!
ايوة هي عملت الشكل الصوري ده عشان يخدروا به الناس مقابل قضاء حوائج هؤلاء.
طبيعي اجهزة المدن تتعامل معاهم ومع غيرهم انما الحقيقة الاتحادات دي اتحادات وهمية بلا وديعة او شركة يعني تقدر تقول زي عدمها.
– طيب ما الناس دي كانت بتتكلم بلسنا؟؛
الناس دي بتتكلم بلسانك لأنك اخترت تكون علي الهامش فا استخفوا بك لأنك قطعت لسانك بإيدك، وهم ملهمش اي تلاتين لازمة.
– طيب لو عايز اعمل اتحاد ؟!!!
طبعا من حقك وعلي فكرة انشاء الاتحادات حسب قانون اتحاد الشاغلين الجديد بيلزم كل عمارة أو بناية بإنشاء اتحاد خاص بها للصيانة
– طيب بالنسبة للاتحادات الوهمية والمزورة ممكن تتلغي؟!!!!
طبعا ممكن خصوصا لو معاك مايثبت بيان تأسيسها، وترسل مايفيد عدم وجود وديعة او شركة للصيانة غير انها في الأصل ملغاه بقوة القانون لانه معندهاش لا وديعة ولا شركة.
وعشان كده كل رؤساء المدن ارسلوا أوراق الاتحادات الوهمية للشئون القانونية.
ملحوظة تم حل اتحاد شاغلين مارينا بعد انشاء أول وحدة صحية ، والسبب ان الاتحاد يلغي بعد اكتمال الانشاء ويستبدل بشركة صيانة، واعتقد ان كل مناطق المدن الجديدة  فيها وحدات صحية ومدارس كمان دا اتحاد قام بتدشينه مجموعة من الوزراء فما بالك ….. ولا أيه