هجي لك بس مش راكع.. شعر: صبري القن
هجي لك بس مش راكع
معنديش فكرة ايه المانع
وحلمى شايله فوق راسى
معنديش غيره من دافع
لكنى ف حلمى انا موجود
وسط الخوف وده الواقع
بعيش الخوف من بكرة
ومفيش بكرة و مش طامع
مفيش مخلوق على ارضك
مش مهزوم ومش خاضع
هموم الناس تعيش وتربى
ف عيالها ولا نافع ولاشافع
ولا فايدة ولا عايدة
ولا كنيسة ولا جامع
مادام اللقمة مش سهلة
هنفضل أسرى للشارع
يجرب فينا قوانينه
ويسقى نبتنا الطالع
يعلمهم على كيفه
يربيهم كما البايع
فيبقوا حلمنا المغدور
ويبقوا حلمنا الضايع
يتوه النور ف اعتابهم
يتوه النور والوازع
هجى لك بس مش راكع
ومش تابع
هجى لك رغم ان انا لا
ف يوم بعت ولا بايع
ولا عرضت لجل اكون
ولا كنت ف يوم طايع
هبوس اقدامك البركة
وادوس على قلبى لو والع
واحرض كل شراينى
واهزم اى شىء خانع
لجل تقومى من تانى
واحقق وعدنا الوادع
هجى لك قلب عاش
للحب وكان بارع
هجى لك تانى وتالت ورابع
وخامس وسادس وسابع وتامن وتاسع
وعاشر مرة ف ايدى الدفة والمجداف
ف ايدى الخبز والصانع
وابنى تانى أحلامنا
وابنى تانى ف مصانع
هجى لك قبل اى شىء
واجى بعد اى شىء وايه المانع
ص
